Plantun de Prouvènço

Pèr coumpara dos planto d'encò nostre

Cyanus graminifolius & Typha domingensis

Cyanus graminifolius

Asteraceae Compositae

Nom en français : Centaurée panachée.

Descripcioun :
La centaurèio-à-fueio-de-gramenun trachis en coulounìo dins li tepiero, li cresten venta, de cop que i'a dins lis esboudèu e li blachiero de colo. Flouris soulamen se li coundicioun soun bono autramen se multiplìo vegetativamen. Se recounèis eisadamen à si fueio estrecho longo e bourrihudo e subretout à si bratèio longamen cihado e argentado.

Usanço :
Couneissèn pas d'usanço particuliero pèr aquelo planto. Fau saupre que soun cousin, lou blavet di champ èi manjadis e a d'ùni prouprieta interessanto.

Port :
Taio : 10 à 40 cm
Fueio : alterno
Tipe bioulougico : Emicriptoufite
Cicle bioulougico : Planto renadivo

Gènre : Cyanus
Famiho : Asteraceae
Famiho classico : Compositae
Tribu : Cardueae
Ordre : Asterales

Coulour de la flour : Vióuleto
Petalo : >6
Ø (o loungour) flour : 3 à 4 cm
Flourido : Printèms

Sòu : Ca
Autour basso e auto : 800 à 2200 m
Aparado : Noun
Mai à jun

Liò : Tepiero seco - Cresten venta - Esboudèu - Blachiero
Estànci : Subremediterran à Mountagnard
Couroulougi : Mediterrano-Mountagnouso-Nord
Ref. sc. : Cyanus graminifolius (Lam.) Olšavská, 2009 (= Cyanus triumfettii subsp. axillaris (Willd.) Št?pánek, 2004 = Centaurea axillaris Willd., 1803 )

Paviho-rousso

Typha domingensis

Typhaceae

Àutri noum : Fielouso, Filouso, Masseto, Cire, Sagno.

Nom en français : Massette australe.

Descripcioun :
Coume tóuti li Typha, la paviho-rousso se recounèis à sis espigo femello e masclo. N'i'a cinq meno de Typha ; aquelo se destrìo, de segur de la coulour de l'espigo femello, rousso, mai peréu de si fueio pas trop largo e en mié-ciéucle en coupo, e tambèn de la loungour de separacioun entre li dos espigo (2 cm). Li fueio an d' auriheto gaire redouno au contro de T. angustifolia (vèire lou dessin).

Usanço :
Li fueio de paviho podon èstre utilisado pèr lou sagnage di cadiero e li flour pèr rempli li matalas. Se saup mens que li brout soun manjadis coume d'espargo. Se pòu faire de farino emé li racino e uno meno de pan emé l'agriero.